Jenische

Di Jänische si die drittgrössti Bevölkerigsgruppe vo ursprünglich nomadische Mensche in Europa und wärde glägentlich mit de Roma verwächslet. Ihri Härkumpft isch ungwüss, Teili vo de jänische Schprooch wysed uf e sehr langi Gschicht hi. Si gönd wohl au lenger zrugg, als es di wyt verbraiteti Theorie vermute losst, dass di Jänische e Volksgruppe mit eigener Schprooch seiged, wo im Zug vo de Buurechrieg (1520 bis 1525) us dr Schwiiz usgwanderet sig.

Teilwys werdet si au als wyssi Zigüüner bezeichnet, wil si im Verglych zu de Roma e helleri Huutfarb händ. Dass es überhaupt zu me ne Verglych mit Roma choo isch, liggt do dra, dass Jänischi als Randgruppe vo der Gsellschaft oft in ähnliche Brüef (Schäreschlyfer, Chorber und Gaukler) tätig gsii sind und dass si es nomadisierends Läbe gfüert händ. Hützutags sind di maischte Jänische z Dütschland halbsässhaft oder sässhaft. I dä Schwyz gits 35'000 bis 50'000 Jänischi, wo vo däne no 3'500 ganzjährig uf d «Reis» fahred und nöd sässhaft sind. Für anderi Länder wie Öschterrych, Frankrych, Luxeburg, Belgie und d Holland liged kaini Aagabe zum Bevölcherigsaateil vo de Jänische voor, will si bishär einzig i de Schwiiz als nazionali Minderheit anerkännt sind.